MahabangaBinaeaybay

“Baybayon it Akean”

Kon tig-aeamihan
ro baeay may tukod
sa katueondan
agod indi’t hapayon
it hangin nga dayuyon

Ro atop
gabaealiskad
sa kabaskugon

Indi makapaeawod
gabukae-bukae
ro eawod

Para may pangsuea
katunggan
ginkuyaktan
kon imo tan-awon
eanas-eanas eon

Manag-a, manikop,
magsag-on’t tapangan
mangahig it kayog
sa katangkehan

Magubod it nipa
agod may tinuea
ieamhay sa sinikpan
tapos payukan

Paghalin ni amihan
malipayon ro tanan
malinaw ro kaeaeawran
makapamunit eonman

Abo nga tawo
sa baybayon
medyo fiesta
kon tan-awon

Sari-saring isda
ro imong Makita
halin sa maeagko
paadto sa maisot

Kon panginhason
ro imong isuyon
sa tangaean ka maadto
abo sanda idto
gapamueot it bato

saang,sikad-sikad, bug-atan
may kagay-kay ag sigay,
imbaw, litog, abahong
agihis, taeaba
puyde sabawan ag kilawon

Kon gusto mo magpahangin
sa baybayon it Jawili
maligos sa baybay
daritso sa busay

Ruyon ro manggad
it aton nga kaeaeawran
ngani kasimanwa
aton gid nga amligan


“Kaeueuoy nga jose”

Si jose
Perti,
Kon magpadeagan
It awto
Abaw, grabe!
Nagaburhot eang.
Hambae nana
Kon mahinay ka
Maabutan it disgrasya
Sa kadasig na
Owa maabti.
Pero bumonggo sa poste
Anang ueo bumotse.
Kaeueuoy nga jose
Nalipatan,
Ro disgrasya
Sumubeang
T’a kana.


“Pabay-i eang nay”

ano ing ginaobra nay?
hambae ni bong;
si bong hay pitong dag-on.
ginaukay ko ro imong
mga luma nga eambong
hay akon nga tapaean
ro mga gisi.
sabat it anang nanay.

ham-an tapaean mo nay?
nangutana imaw it uman.
bong, sa hunyo
gabukas ro eskuylahan.
maiskuyla ka eon bong
owa man kita’t kwarta
pangbakae it ternong kamiseta.

sige eang nay a
puyde pa man ron
basta malimpyu eang
ro anang ilukon.

pabay-i eang nay
maeskuyla gid ako it mayad
agod indi eon kamo
malisdan ni tatay.
hinapeos it nanay ro ueo ni bong
nagtueo ro euha
sa nabatian sa anang unga
ham-an nagtangis ka nay?
owa bong a;
napuling eang ang mata.


“Mahae ko”
(Haead ko sa akong asawa)

Sa unang adlaw ikaw nakilaea
Ro imong tan-aw may kung anung daea
Gapaeanutsot sa kasudlan it akon nga kaeawasan
Eabi gid sa akon nga tagipusuon ikaw nagustuhan.

Owa eon ako nagusik it oras ag tyempo
Basi maunahan pa ako it iba nimong amigo
Sinampit ka magpakasae huo eagi sinimo
Ngani natigayon ro pagsambilog natun.

Ro atun nga pag-iba binugnaan it ginuo
Ngani sa kalibutan ato’ng unga natawo
Ag sa sunod nga binuean maguwa eonman
Ro pangaywa nga bunga it paghigugmaan.

Maskin meyor eang nagkasae katon
Ro aton nga pag-iba owa’t kapares sa iba
Gapalanggaan kita sa oras nga tanan
Owa’t makapabueag hasta kamatayan.


-unga sa karito-

Kato…
gasakay imaw sa karito
ginatikeod it anang tatay ag nanay
paadto sa pangitan-an
bukid nga tambakan; basura it manga gamhanan.

Makaron…
owa eon imaw gasakay
imaw eon gatikeod it karito
ro anang unga gasakay
nga gusto man magtikeod it wasak eon nga karito.

Hasta san-o?
magtiyog sa makara ro pangabuhi nanda.
paano sanda makausoy it ubra?
kun ro ubra indi makaabot kanda.

Kun owa ka man it kilaea
indi ka makasueod sa ubra
pero ro iba maskin owa it diploma
basta ninong si congressman
nagasweldo kada kinsenas ag katapusan it buean.


-Politikadong tawo-

Ro manga kandidato
Mayad eang kun eleksyon
Maski ano’t eayo gusto abuton
Makapangayo eang it bulig nga iboto, promisa ro kabaylo.

Pagkatapos ngani it eleksyon
Ro nagdaog malipayon.
Mintras ro pirde masinueob-on,
Hay naubos ro manggad it pamakae sa boto natun.

Pero ro nagdaog
Gadahan-dahan eon
It pagbawi ko anang gasto
Ko nagtaliwan nga engkwentro.

Ro anang promisa owa eon baliha
Owa eon madumdumi hay grabe imaw kabise.
Owa gid nana panumduma ro pamueoyo nga gamudlat ro mata
gahueat it grasya nga halin kana…


- hay ano -

hay ano…
kun owa ka it makaun
basta ako gatambak ro hamon.

hay ano…
kun iya ka eang sa Pilipinas
basta ako pirme eang mageayas.

hay ano…
kun r’ing baeay hay gabuton
basta ako hay may mansyon.

hay ano eon?
matanga eang kita,
dunganan eang natun
it pagpanagitlun,
kun ro manga manggaranon mageunlon it hamon.


-Bulig gid baea-

Pagkatapos it bagyo
ro manga mabinuligon nga tawo
todo putos it regalo
para ipanao
sa manga apektadong pamueoyo

May akon eang napan-uhan,
ro ibang putos may pangaean
para gid baea masayran?
Nga rato hay halin kay tserman?

Ro iba tudo gid ro suporta,
sa manga tawo nga nagaproblema.
inanod ro pagkabutang,
pati manok nga pamboeang.

May una man nga iba
nagdonar it kwarta
nga gusto pa ibida
kun pila ro ginbulig nanda.

Bulig gid baea?
o may kabaylo nga gusto sanda.
hara ro oras ginhueat nanda
nga makita it iba
nga mabinuligon kuno sanda.

Sa tv ag dyaryo
makita mo ro manga tawo
nga may ambisyon sa gobyerno
ginauesob ro baha makapanao eang it regalo.