Luwa nga Akeanon

siyam nga buean
ginbakintoe sa sueod it tiyan
pagguwa sa kalibutan
masukoe sa ginikanan

Maeamig ro kahapunanon
Si nay Tekay ag si tay Pulon
Gaeambid ro tuhod
Sa may balkon galingkod

Piesta it itum nga nasareno
Nagdueotdutan ro manga tawo
Isnatser hara gid ro gusto
Para makuot ro bulsa nimo

gulpi eang akong bumangon
sa tunga it kagabiihun
abi ko ang unga gatangis
gali hay silit it losis

ro akon nga asawa
nagpasuso it amon nga unga
todo man ro eutgot it tunga
mintras nagapatungka

nagalarma ako it aga-aga
agod timprano pa magsueod sa obra
ugaling ro amon nga unga
tungang gabii paeang umayahab eot-a

kamang iya kamang idto
daeagan iya daeagan idto
hayra ro trabaho
ko isaeang ka suldado

ako hay may amigo
si kwarenta singko
mabuot ag masaligan
sa oras nga tanan

malieon manueo kita
sa may punta it Afga
abo nga kogita
gahueat nga panaon
para magpakaon

bulig bira it taksay
agud makahueay
para may pangeamhay
sa tinuea ni nanay

tag-ieinit eonman
gapaeanggiltak ro daean
anwang sa kug-ongan
gausoy it tueogban

Si Jose nagpahaeab it anwang
sa kilid it pang-pang
ga pueopanihoe
mintras gakaon it santoe

Ako hay may amiga
Si mam edna
Mabuot ag gwapa
Maabiabihon ag mabinuligon pa

Kon manggaran ka
abo kang kilaea
kon pobre ka
owa kat kilaea

Sarhento magwidro ka eon
ko aton nga baeonon
hay may panawon
ro aton nga platon


Bangon Liberia
magtinguha ka
agud umalsa
ro ing ikunomiya

Si jose nanag-a
sa liong-liong it sapa
ro anang inuli
guraming sang saga

si kupido ga pamana
bukon it isda
kundi tagipusuon
it mga batan-on

Ham-an baea?
kon halin ka sa probinsya
ag hanaeang ka sa banwa
ginatan-aw tan-aw ka
dahil bay-ong ing daea
indi kaparehas nanda
plastic bag may borda pa

Buaya
nagkalhit sa karsada
gapueopasipeat
ku anang mata

Mahae ko
ikaw nagtao
it daean nga diretso
nga owa ko gienato
kat meron pa ako

Akab
kaeoeouy patyon
Makaueogot buhion
Eaom mo mabuot
Sa sueod ro dukot

Tagipusuon ko
gapitik para kimo
pirteng hibok-hibok
kun ikaw magtueok

gapasaeamat guid ako
sa imong gintao nga oras ag espasyo
para ako makaantigo

Saeamat guid Sir Maeara
sa imong paghaega
sa akon nga ginobra

Malieon masadsad kita
idto sa pastrana
abo nga banda
nga nagapresenta

Mga torista
sige hala bira!
pwera eang pasma
maskin maubos ro kwarta
basta masadya

Sa ati-atihan
iba-ibang tribu
ro makita nimo
nagakiay-kiay
may kulintas nga eusay

Ro mga may panaad
sige eang it sadsad
sa tunog it tamboe
nga nagalinagabong

Ati-atihan eonman
gagueutok ro daean
owa eon it maagyan
ro mga saeakyan

Si edat
may daea nga aeat
naeusat
sa bil-at

Madueom pa ro baybay
idto eon si tatay
gapamueot it segay

si lola nagsasa
nga nakapalda
pag-uli nana
ro anang paa
gapaeamuea
sa pang-it it paea

easgas eon
ro alima ag siki
ku imong ginikanan
sa pagpanarabaho
agod may itao
nga baeon kimo

Owa pa gamukeat ro adlaw
tapos eon ako it pamahaw
para di maaywanan
it amon nga saeakyan
paadto sa ginaobrahan

Sa akon nga pagpahuway
sa kilid it dueay
nag asaw-asaw
gumuwa ro baeangaw

Sa akon nga pagpamaeandong
akon nga hadumduman
ro akon nga inagyan
kat gakaeam ro akon nga tiyan

Gabuyog rang ueo
sa pagpainuino
ro humbak sumaylo
sa mga karsada
gapamueot it bato

Taguipusuon nga hopia
kun may imo manao
kun owa kat-imo
owa’t gatao

Nagtug-on si juan
owa pa naastanan
anang inaywan
pagbalik nana
balitok sumubeang kana

Sa may kanyogan
abo nga putyukan
amon ginsug-an
eumopad ag inaywan
ro anang pugaran

Ro amon nga mangga
abo nga bunga
ro nagapanamkon
gapueopanagitlon

Si lolo
nakatungkod
naglingkod
sa bungsod

Sa akon paghalin
akon ginbilin
paghigugma nga matuod
kimo hanungod

Kun adlaw- -
abu nga bituon
sa baeay namon
manipis eon abi
ro atop nga kugon

Unga halin sa eskuylahan
gagaab buyot sa dueong-gan
pangutana ro ginikanan
ginulipat it maestro

Pakeang sinakyan
sa banglid Nagpaduylon
pag-abot sa dueonan
hanang-it ro dueong-gan

Si jose
sige eang estorya
sa kaklase nana
hakit-an it maestra
eumopad ro pisara

Nanikop ang manghud
idto sa katunggan
tikig nadakpan
sinueod sa tapangan

Sa amon ro baybay
gakaeadueay
ginakaun it tubi
gaeapad ro bibi

Malieon
maadto kita sa hunasan
abo nga panginhason
nga aton pueuton

jose sakaa
ro amon nga mangga
abu nga euto
gakaeapupo

Ro swerte kuno
nakasueat sa paead
pero kun tan-awon
kibueon

Bandera it Pilipinas
sa Liberia gapagaspas
kaibahan sa misyon
magdaea it kalinong

Pataob eon
ro bintoe pahaumon
gaguwa ro alimango
mausoy it pagkaon

Ham-an baea
indi t’a maduea
sa iba ro hisa
gusto pang mangsamad
it pamilyang mayad-ayad

Sa amon nga baryo
abo gadayo
maligos sa baybay
daritso sa busay

Paghalin ko sa amon
eubak-eubak ro karsadahon
pag-uli nakon
sementado eon

Si tatay
halin sa eanas
daritso sa baybay
para manginhas

Akon haeksperyensyahan
mabudlay owa’t tinun-an
puyde ka lokuhon
it mangin-aeamun

Humbak
sa eawod gahaeabok
gabalilin paadto sa binit
kun tumama sa batik gaeagiit

Adlaw gabii
ikaw ginaisip
sa ang painuino
gapaeanutsot

Angklahi it mayad
ro baroto ngaron
basi anuron
it sueog nga dayuyon

Mabahoe ang paghigugma
ayaw’t abusoha
basi maduea
sa sangpisok it mata

Kun mangutang grabe ro aeam-aeam
maski ano imitlang
makahueam eamang
pag-abot it baeayran
indi eon makit-an
hay idto t’a sa bueangan

Ro kabuhi it tawo
kaparehas it baroto
paeutaw-eutaw
kun amat malinaw
pag-abot it kanas-kanas
gapaeangeat-as

Boyti eon
ro hae-o ag eusong
aton eupakon
ro sab-a ngaron

May akon nga amigo
umpisa pa kato
ginsampit ko imaw
nga magsuldado
owa t’a imaw it gusto

Mananggiti
saka sa agahon
pagkahapun
puno ro garapon

Sige simba
paeuhod-euhod pa
paguwa nana
sige hala bira
tsismosa

Sa sueod it simbahan
sobrang diyosnun
inde makapusa it kueon
ro ugali gali
inde makaon

Mananggiti
daea ro kawit
sa likod nakakaw-it
sanggot
sa kilid nakasukbit

Kato anay
ro mga daeaga
naka maria clara
makarun kueang ro tela

Tuba makahieilong
kun masubrahan
mag-aein ing tiyan
kun aeang-aeangon bugriton

May akon nga kilaea
nagdiga
pahutik-hutik pa
akon hasayran
ro anang istorya
andang kanyugan

Ham-an baea?
mabudlay eot-a
magsuoed iya
sa sityo ngara

Viagra
pampatig-a
kun indi makaya
tigok ka

Kun akeanon ka
ayaw’t samara
ro sityo ngara
daya ro giya
agod kita magkieilaea
Viagra
sa iba mo ibaligya
owa kmi it kwarta
nga inugpangumpra

Asawa ko
ikaw eang higugmaun
ueanon ag silakon
hasta kamatayon

Akon hakit-an
sa kilid it kalan
nag-idlap ro bituon
nakadukot sa kueon

Si jose matig-a ra ueo
indi magpamati sa anang lolo
pilit umadto
sa puno it abokado
linagas it karnero

Si jose nagsakay sa anwang
umagi sa eunang
naligos it aeang-aeang

Ro amon nga electrician
generator ginlipyuhan
ro tudlo naputlan
hinigop it cooling fan

Madanlog ro eatayan
Pamuyot it mayad
Basi ka hiliskan
It anang bueoytan

Gauekad
ro manggad
sa eawod
it Akean

Baybayon sa Akean
kanami pamasyaran
it tagipusuon
nga nagahigugmaan

Baeay sa baybayon
may tukod sa katueondan
agod indi hapayon
it hangin nga amihan

Tighabagat sa Akean
malinaw ro kaeaeawran
puyde mamunit,manginhas sa hunasan
may magpatindog it bintahan
ro iba gapamalaran

Akeanon
kaeaeawran
ro isaea nga ginabuean
it pangabuhian

Ham-an baea?
gusto it iba
madali makakwarta
maski ano obrahon
pati dinamita gamiton

Indi mo makita
ro kanamiun it akean
eabi gid ro baybayon
nga ginapabugae namon
kon indi mo adtunan
ag tan-awon

Ginaduyog ako
indi makatueog
pilit nga piyungon
mukeat man gihapon

Masakit ro ang likod
nasobrahan it lingkod
sa pungkoan
nga hawod

Naglimad ang mata
paghuyap it baka
gatabok sa karsada

Jose,
mabahoe ro bukoe
hinaboy it pukoe
it kahampang nga bungkoe.

Paueoulihi
naubosan it swerte
Siin kat-ing umagi
Namueot it dolse?

Abi nimo baylihan
sa tunga it kaeaeawran
gali hay bugsayan
gapamunit it tulingan

Sa akon pagpamana
may akon nakita
mabahoe nga pakoe
gasandig sa duoe
gapueopanihoe

Tudo bugsay
agod makaeampas
sa manga eusay
para indi masangit
ro aton nga bonit

Mahaba nga kaeat
birahon sa baybayon
para madaea
ro may sueod nga eambat

Malieon manaksay
may euta sa baybay
tama eon nga pahuway
ang tiyan gadagaay.

Kapagangan
ginapanaguan
it tulisan
kon eagson
it tambilawan

Nag-adto ako sa pungtod
may akon nakita
abi ko ubod
gali hay tuod
nagahawod-hawod

Abo nga taea-taea
kon may euta
andang sanggiton
ro tulisan
nga nagayabon

Sa idaeum it bilog nga buean
may akon nakit-an
nagahigugmaan
nagsumpaan

Adto ako sa nabas
nakakita ako it guyangkas
may suksok nga tsinelas
nagabaktas

Pag-uli ko sa tangaean
akon nakit-an
bag-o nga basketbolan
ginpandungan

Kapagangan
istaran it kaisdaan
pinaeokpan it dinamita
nagbakwet sanda

Tuyom
matunok ka
maeaea
gapaeamuea
ro imong mata

Idto sa amon
ro muhon
nagakamang
paadto sa pang-pang

Ro amon nga pilapil
nagahabil-habil
ginakinitkit
it kaeapit

Akon ginkaskas
an-um nga kwerdas
gulpi eang linagas
it ayam nga mangtas

Paghalin ko sa baeay
ang unga nagbabay
nagtueo r’ang euha
sa uyahon nag-agay

Ro kasubo nabayluhan it kalipay
sa pag-abot ni tatay
may daea nga tinapay
para sa panimaeay

Kon indi eang sa kwarta
owa t’a ako iya
gatiis it kasubo
sa lugar nga maeayo
Gatueo-tueo ro hueas
sa eawas gaawas
sa paginapas
it madamoe nga bagaas

Nag-adto ako sa baybay
nakakita ako’t sigay
linabo ko it wasay
suminggit it inaway

Kato anay
pagtunog it lingganay
gauli eon sa baeay
makaron
sa eaagan
hasta mahapun

Mga kasimanwa
ako pasenyaha
hay akon pinaea
ro ang kodak iya

Ro anwang
sige eang bira
owa gid pahuwaya
binunaean pa
agod umarangkada

A’ng kaibahan
maadto sa Ghana
napurnada
inaywan it eroplano
humalin it timprano

U.S. Airways
kamayaron nga piloto
ro eroplano
inubrang baroto

U.S. Airways
bungkoe nga eroplano
nainitan t’a siguro
sinubsob r’ang ueo
sa tubi nga nagayelo

BFAR namrublema
sa mga balyena
kon ano ubrahon
hay gusto t’a magpabaybayon

Pag-umuean
ro baha gapangarsada
paalin t’a
ro kanae
puno’t basura

Si jose
nasubrahan sa bahae
nahueog sa kanae
nagngusae

Si jose namintoe
nakakita it bukoe
hanang-it sa duoe
kinaon it kuoe

Pugtunod it buean
umarangkada ro bugsayan
paadto sa kaeawran
manakop it pak-an

Gaikit-ikit
ro manga eagpit
owa gid it eanggam
nga naigpit

Budlay pukawon
gapakuno-kunong tueog
indi gid magbangon
basi suguon

Baeay
it anay
sige eang habok
ginaakad ro eapok

Ginpalibutan eon kuno
ro kuta idto sa sulu
basi may gabot
idto sanda masuhot

Hostage crisis sa sulu
nagkamang ro mga suldado
hay sarado eon kuno
ro kabukiran it Indanan

Sa amon nga banwa
abo nga gwapa
si angel locsin bumisita
ay abaw! Perting kagwapa

Abaw!
mga kasimanwa
ro aton nga banwa
pito eon ro lista
it pagpangeugos

Ro mangin-aeamon
kon amat naduea ro tinun-an
mag-aeayatan
kueang eang magsieingkuban

BFAR nagmadinaeag-on
sa pagtabog
sa mga balyena
nga umalagwa

Wildfire sa Australia
namrublema sanda
kon paalin paeungon
ro nagadaba-daba
nga manga banwa

Ro akon nga saeakyan
dinaea sa paobrahan
akon binalikan
di ko makit-an
idto t’a sa basurahan

Pag-abot ko sa baeay
owa t’a nalipay
ro akon nga unga;
akon pinangutana
ro sabat nana
sin-o ka?

Kaadlawan ni tatay
namilo si nanay
it eambong ni tatay
nga nakatago sa baoe

Adto ako sa Kalibo
nakakita ako’t kalbo
may tus-on nga nigo
ro sueod hay biko

Maski mabahoe ro gasto
sige eang adto
hay mas mabahoe pa kuno
ro anang epekto

Idto sa Ligazpi
may isaeang eaeaki
ay abaw! Perti
ro anang asawa
wa gid pahuwayi

Pag-abot ni bising
ang mata napuling
sa kabaskog it hangin
ro bubong hinalin

Idto sa manila
ro karsada gasaeanga
abo nga tulay
wa man it eutay

Hambae ni lola
bukon’t humay ro mag-asawa
nga puyde ieuad
kon mainitan ka

Akon nga kaibahan
sige pangumpra
pag-abot it kiluhan
ro anang karga
gapaeanobra

Pakontis it kanta
ro ibang umintra
nalipatan ro linya
it andang kanta

Sa puno it pagatpat
may gaigpat-igpat
abi ko mueto eon
gali hay bituon

Pag-adto ko sa syudad
nakakita ako’t bukag
nagahayag

Pag-uli ko sa baeay
naabutan ko si nanay
gapanampuay
gahueat kay tatay

Nay maeskuyla ako
bong, owa kita’t panggasto
sige eang nay
mamunit man si tatay
Uli eon nay
umabot si tatay
hambaea kay tatay mo
owa pa ako ka bingo

Ro pag-unga
bukon’t basta-basta
perting aeagunta
kon mag-una

May akon nga kilaea
ginpaeskuyla
imbes sa eskuylahan
idto t’a sa bueangan

Akon gintaw-taw
ro akon nga bunit
gulpi eang pinang-it
it kuyapnit

Akon sinaka
ro puno it eangka
gulpi eang binugbog
it mabahoe nga kabog

Pag-uli ko sa amon
nageupad ro kueon
owa nadumdumi
naabutan t’a it agahon

Nagmukeat ro mata
pagkakita it grasya
pero kon obra
nagapiyong

Nagpaeanindog
ro akon nga baeahibo
sa pagkilaea
ni sir Maeara

Pagsakay ko sa eroplano
ro akon nga painu-ino
sa Pilipinas eot-a
nagapamiyesta

Si tatay nananggot
sa anang pagbageut
anang tudlo nahapit
it mataeum nga sanggot

Maeas-ay
ro tinapay
kon ro palaman
hay mueay

Ro pal-it ni jose
nabukrit
paalin t’a
ro anang helmet
sa siko nakasab-it

Siin ka maadto?
idto sa kalibo.
maalin ka idto?
mamueot it bato.

Container van
gin-obrang istaran
para kon pabakwiton
madali eang hakwaton

Ro amon nga baroto
indi magdaritso
sa humbak nga maeagko
galiko-liko

Idto sa boracay
abo nga tuway
nagaeaway
sa binit it baybay

Sa adlaw it graduation
Abo nga malipayon
Hay ro andang pag-antos
Natapos eon

Pagkatapos it graduation
Abong mangin-aeamon
Ro magtililipon
Sa POEA

Pageampas it marso
Madugangan eonman
Ro istambay sa kanto
Gapueopanigarilyo

Malipayon ka
Hay nakatapos ka, it pag-eskuyla
May akon eang ipangutana,
Siin ka maobra?
Humibayag si nene
Hay tapos eon si toto
Makabulig eon si toto
Sa pag-eskuyla ni nene

Pagtangda ko sa eangit
Nakita ko ro kuyapnit
May anang ginabitbit
Tuba nga sangkawit

Indi ko maintindihan
Ro akon nga ginabatyagan
Sobra ro a'ng kalipay
Mauli eon ako sa baeay

Mga kasimanwa
Ro aton nga banwa
kon ikaw mangarsada
Pirteng limpyuha
Dahil sa Re-Greening Program nanda

Sa akon pag-uli
Idto sa Jawili
Abo nga nabag-o
Sa amon nga baryo

Pobre kon magkakaso
Prisohan ro diretso
Manggaranon ngani
Itawag pa kay kumpare

Tinukuran ni jose
Ro tabingi nga katri
Agod indi eumagiit
Pag-abot it gabi-i

Pag-abot it uean
Tigasaw dumaeagan
Basi imaw maeumos
Sa uean nga gahagunos

Si abon
May daea'ng kueon
Ro sueod
Adobong tik-eun

Paghalin ko sa amon
ro piso nga baeon
binakae it kueon
ag sinudlan it turon
Mga kasimanwa
Timprano pa ro bisita
It bagyo iya
Sa aton nga banwa

Ean-agon eoman
Ro singa-singa
It baeatingan
Ni lolo juan

Nagreklamo ro saeakyan
Pag-abot it uean
Nageutay ro daean
Puyde eon nga tamnan

Baboy
Ginpasibangdan
Imaw ro hinalinan
It swine flu
Idto sa Mexico

Mauean nga agahon
Nagkaeahueog
Ro eaya nga dahon
Sinaeap it hilamun

O buean,
Panaog iya sa kalibutan
Abo nga nadueman
Nga dapat maiwagan

Haboe nga tatlong doble
Indi gid makapirde
Sa kaeamig it gabii
Gakurog sa binit it katri

Madueom nga gabii
Hinulikap ni jose
Ro ana’ng siki
Nga hanang-it sa alambre

Sa idaeum’t bilog nga buean
Kitang daywa nagsumpaan
Indi magbueag
Hasta kamatayan

Maeamig nga hamog
Ang bueboe nagtindog
Pagsapding sa’ng dapa-dapa
It hilamunong mabasa pa
Mataas nga bukid
Akon sakaun
Maeapad nga eawod
Akon eanguyon
Ro tanan akon ubrahon
Ikaw eang akon maangkon

Maabtik nga eagpit
Eanggam inigpit
Sa sobrang sakit
Eanggam pumiyait

Si butoe
Namintoe
Galingkod sa duoe
Nakadawi‘t bukoe

Pagtueo it uean
Nagtueo man
Ro kasubo sa akon nga dughan
Kat imo ako nga inaywanan

Jose kuhita
Ro euto nga kapaya
Basi maunahan ka
It kabog nga mabahoe it mata

Mag eleksyon eoman
abo ro madaeagan
manga manggaran
ikaw; gusto mo man?

Mabudlay maginhawa
kung r’ing ilong hay gabara
maski alinon’t sipnga
sige ra anang gawa

Sayod man sanda
nga luma C-130 nanda
sinakyan pa
di nadisgrasya

MB commando
gusto maging barko
kinarga tanan nga pasahero
basi man sumirko

Hambae it nanay ni hayden
tinur-an ni katrina
ro andang unga
nga gumamit it droga
mapati ka?

Sa amon kun domingo
gaeupad ro kaldero
paalin si misis
idto t’a gabingo

Maeamig nga hangin
gahap-eos s’ang panit
owa baliha
ro sobrang kainit

Idto sa jawili
ro amon nga kingki
indi magsindi
kun tungang gabii

Manakaw nga manggaw
hinaboy it bangkaw
ni lolo islaw
tinamaan sa kalimutaw

Si nanay nagkalaykay
it binuead nga paeay
sa likod it baeay
nahueogan it li-ay

Idto sa baybay
ro manga sigay
nagkiay-kiay
padto sa due-ay

Abi ko uean nga kaeayo
gatueo halin sa ikatlong grado
gali hay inhenyero
gahinang it yero

Idto sa Liberia
abo nga ita
nagaopisina
indi kapares iya
ginasikway sanda

Kun magadto ka sa vivo
sambilog nga sapa
agyan mo it kapito
bago ka makaabot
igto sa alipungto

Sa paaeabuton nga eleksyon
dapat saeaon ag piliun
ro manga kandidato
nga ibutang sa puwesto

Si juan nagadto sa bueangan
may daea nga mus-an
ana kuno ibueang
pag-uli nahimuebuean

Gapanago ro adlaw
nahadlok matunaw
sa euha it eangit
nga nagasagitsit

Adlaw it manga tatay
gapanampuay si nanay
gahueat kay tatay
nga maguli man sa baeay

Pirte r’ang daeagan
pagtueo it uean
madanlog t’a gali
linampos ang buli

Madueom nga hapun
akon linunlon
ro matambok nga tamilok
sa puwak luminggaok

Kun mainit magreklamo ro tawo
kun maeamig magreklamo man
owa eon it paadtunan
ro nagtuga it kalibutan

Nagsueat ako’t binaeaybay
ro bakaean nagkaeay
abi ko anay
gali hay agay-ay

Pag-adto namon sa boracay
Ang tiyan dumagaay
umadto kami sa kaean-an
naduea rang ginabatyagan

Hinueat ko maghueaw
hasta nagasaw-asaw
ro daean puro eam-aw
todo ra ang liaw-liaw

Sa kabaskog it uean
dumueom ro daean
lumiko-liko ro saeakyan
daritso sa katunggan

Sa akon pagdungaw
sa likod it pantaw
umagi ro manggaw
nagangawngaw

Magae-um ro kaeangitan
manami magwarang
hay owa it init
indi ka maganghit

Todo ra ang daeagan
basi maabutan it uean
natapilok ang baeatingan
linudgod r’ang aliputan

Kumatoe r’ang ueo
abi ko kuto
gali hay uban
nagtubo sa alipudwan

Eaum ko owa it buean
paguwa ko sa daean
nanago manlang gali
sa madamoe nga uean

Namatay si Michael jackson
pero ro anang manga kanta
padayon ro sonata
para kita magkasadya

Naduea si michael jackson
pero ro anang kanta
magapabilin katon
maghapeos sa aton nga tagipusuon

Umuekad ro aso
sa daeapugan ni lolo
may ana nga ginaea-ga
pinayukan nga eangka

Masilaw ang panan-aw
pagtangda ko sa adlaw
abi ko makurap eon
mahayag pa gali gihapon

Mabahoe nga taeabong
sa likod’t anwang tumungtong
lumingot ra ueo sa waea ag tuo
may ginausoy manwit nga itum ra ueo

Kato anay sa amon nga baeay
pag-abot it gabi-i
si nanay gasindi
it di-gas nga kingki

Nagtanum ako’t mangkupa
sa kilid it among banggera
owa’t makabuoe sa bunga
kundi ro akon nga asawa

Owa’t sueod ro amon nga kaldero
si tatay idto sa kanto
gapueopanigarilyo
mintras gahigop it Generoso

Pag-agi it baha
naeuka ro eangka
dumaeagan si oka
ra baka nakahigot sa eangka

Pag-abot it uean
dayon madumdoman
ro gabot sa bubongan
nga owa pa nahulipan

Basta may kaeayo
maguwa gid ro aso
maski isueod mo pa sa drum
ag tabunan it semento

humawod ro eatayan
pag-agi ni juan
sa sobrang kabug-at
it anang ginapas-an

Maski ano’t nami r’ing inubrahan
sangbises ka eang makasaea
tanan eagi maduea
dahil eang sa isaeang ka saea

Pag-agi ko sa daean
manga tawo akon nakit-an
gatangda sa kaeangitan
may ginatan-aw
adlaw ag buean nagkamustahan

Idto sa rigador
tinirador ko ro bulador
nahueog ro emperador
kaibahan it fundador

Buean pinalaman
it adlaw ag kalibutan
ro manga tawo nasadyaan
sa pinakamabuhay nga eclipse
nga natabo sa kalibutan

Kat unga pa ako
hambae ni lolo
kun mag eclipse kuno
ro adlaw kinaon it bakunawa

Uean naghueaw
gumuwa ro adlaw
nanago ro tungaw
paguwa it baeangaw

Tinirador ko ro uwak
tinamaan sa pakpak
tudo ro anang haeakhak
owa gid imaw natapat

Pagmukeat k’ang mata
nagtueo r’ang euha
sa kasubo, owa ka Makita
sa kadlawan it atong unga

Sa kadueom it gabi-i
Gulpi eang nagsindi
Ro puno it kamansi
Dahil sa aninipot
Nga gapatay sindi

Hangin nga mabaskog
Uean ag daeugdog
Unga nanago
Sa idaeum it dapog


Pagdueom it kaeangitan
Si jose dumaeagan
Todo gid ra daeagan
Kaibahan si juan

Nangawa gid ako
Idto sa alipungto
It bukid nga sinaka it grupo
Nagtumpok ro bato

Loko nga kuring
Taw-an mo it saging
Indi gid magtabing
Gusto t’a nana ibis nga sinaing

Pagkapaeong it kingki
Eumagiit ro katri
Suksok nagpanagutsot
Sa bakaean gakapyot

Manamit nga pagkaon
Kaya mo nga tunlon?
Kun ro imong kasimanwa
Gatanga sa gutom!

Pagpungko ko sa bangko
Ang ueo nabunggo
Sa bukoe it anunuo
Nga inubra ni lolo

Paeuto nga paeay
Manga eanggam naghueay
Kun siin andang parte
Kukuton pag-abot it gabii

Pagkatapos it baha
Ro manga bato gumuwa
Sa tunga it karsada
Nagahieilira

Pagpundo it uean
Tunog it paka ro mabatian
Sa kanae ag tueogban
Nagasieinggitan

Ro tubi sa kanae
Nagabukae-bukae
Halin sa tubo it kasilyas
Sa kanae nagaawas

Pagtahop ko it bugas
Ro sangkalitsi nabawas
Ro nigo ko nga ginamit
May gabot ra tagik

Gabiing malinong
May nabatian akong gahagunong
Abi ko buhawi eon
Gali hay tubi gabukae sa kueon

Mabahoe nga bangkat
Sinudlan it balat
Nga pinueot sa dapdap
Ro saeug nageupyat

Bungkoe nga tungaw
Itlog ra pamahaw
Gamantinir ngani ako’t bahaw
Nga salin it bahaw-bahaw

Pageumpat ko sa eroplano
Abi ko nahueog eon ako
Pagbukead it parachute ko
Ay saeamat gid dyos ko

Pagsueod it ber nga buean
Si lolo mahaea ginkupkupan
Nahidlaw kay lola
Sa pihak nga kalibutan

Pagasaw-asaw
gumuwa ro baeangaw
eumopad ro bukaw
linagas it kuring nga manggaw

Nadakpan ko nga pantat
sinueod ko sa aeat
nagpaeak-paeak
ag gulpi eumompat

Hala kamang bao
pagpundo kun may tawo
tagu-a ro i’ng ueo
basi hibagtoe it bakero

Tambo sa kanunouhan
Saha sa kasagingan
Unga sa tiyan
Nga bunga it paghigugmaan

Eleksyon eoman
mamati kita kanda
sa andang manga promisa
pagdumaog balewala eon kita

Kun tig-amihan sa akean
gabukae ro kaeaeawran
ro manga tawo sa baybayon
galikumo kun agahon

Ro baha sa manila
mabuhay eon nga problema
owa pa gid masulbar
sa kaabuan nga lugar

Pag-abot ni ondoy
ro baboy nageangoy
sa kataason it tubi
ro manga tawo nageumoy

Paghubas it baha
eunang ag basura
ro gakalhit sa karsada
idto sa marikina

Pag-agi ni tay pepeng
ro baeay ni lo nolping
hinigot na sa saging
basi maeopad it hangin nga nagahaging

Loko nga ondoy
Tinur-an ro manga tawo mageangoy
Ro indi makaantigo
Sa kanae ro diretso

Paghilangop ni pepeng
Nagpahaum si tay eping
Tinipon ro manga kasapatan
Kaibahan ro kuring

Mayad si pepeng ngara
Naghapit eang iya
Di parehas ni ondoy
Abong tawo ro pinaeumoy

Kanamiun nga dekorasyon
Sa paskwa nga paaeabuton
Ro manga silopin nga basura
Sa puno it kahoy ro kolor iba-iba

Nagwawaw ro bukaw
Owa katagumpaaw
Sa daea nga baeanaw
Ni ondoy ag pepeng

Paano indi magbaha idto sa manila
ro dating maeapad nga suba
pader ag manga pabrika
ro nakabalandra

Pagbaha sa pangasinan
Ro sm sangkuro eang maeapawan
Manga tawo nagdinaeagan
Hay ro dam kuno basi mabuhang

Si tay jose
May bitbit nga poste
Ginausoy ro anang baeay Kun sin eon nga parte
Hay inanod it baha owa gid it swerte

Naobserbahan ko eang baea
Sa manga kasimanwa natong iba
Nagabaeasuean sanda
Ham-an ro kanae nagbara

pag-abot it kagabiihon
nagdaba-daba ro sueo namon
pag-abot it agahon
ro ang ilong agiwon

pageak-ang ko sa halintang
ang waea nga siki sinangit sa alambre
r’ang bitbit nga dueang
nagwasaag ro sueod nga botse

Pag-adto ko sa ugsod
nakakita ako it bungsod
may sigbin nga gatuwad
ro buli hay maeapad

Idto sa tangaean
may ginatawag nga bintahan
payag sa tunga it kaeawran
gadakop it tulisan

Ang unga ag ang asawa
naghampang it dama
napirde ro mama
humibayag si preciousa

Adlaw it manga patay
nagtunog ro agay-ay
tudo ro andang ukay
sa bakaean it amon nga baeay

Abi ko agahon eon
Mahayag abi sa balkon namon
Pagtangda ko sa eangit
Ro buean gatan-aw kakon

Kaeueuoy nga Ronald
Gusto man kunta eumopad
Ugaling ro dueo nga pakpak
Indi gid magbukead

May manga artista
Gusto sumeod sa politika
Ham-an gid baea?
Mabulig gid sanda sa ato’ng banwa?
O gusto eang makakwarta.

Sa panahon makarun
Iya sa kalibutan natun
Ro sampingas nga papel
Puyde magwasak it pamilya nga malipayon

Away ni pacman ag cotto
Ro manga tawo nagpundo
It pagpanarabaho
Para makatan-aw it engkwentro nga gabalingaso

Pagtapak ko sa hilamunon
Basa ro manga dahon
Abi ko hamog it kagabiihun
Gali hay uean kainang agahon

Pinatubog ko ang anwang
Sa sapa nga may eunang
Pagbalik ko para patakasun
Ang anwang gatanga kakon

Kanami gid ana
Kun abu ka it kwarta
Dyos ka kun tan-awon
It manga pobre kapares kakon

Sa kagustuhan it ibang politiko
Nga magpabilin sa puwesto
Ubrahon ro tanan
Masunod eang ro andang gusto

Maeapit eonman
Ro kalibo ati-atihan
Ro manga manakaw
Gapainu-ino eon it pagkakitaan

Ro akon nga asawa
Nagunga sa amon nga pangaywa
Todo gid ro ana nga una
Ro eapsag owa gid gumawa

Sa gabii it bag-ong dag-on
Ro manga pamilya nagtililipon
Agod bilog nga subeangon
Ro pagbaylo it dag-on